دم ودم

دم.ودم.

مفتتح:

القصيده:

بدر منور كان الواد
عمال يجرى ويتكفى
يمسك حجره
يشد النبله
يقوم بركان
ولعه وآدها
يضرب حَبّه
يهرب حَبّه
ورصاصه طايشه
ورصاصه جايه
يجرى وُيعرج
ِوقع الواد
وأنا قاعد زى خيال ح أتجن
بتفرّج
عيال خايبه
تلعب كوره
تحرق دمي
إرفع يابنى
مين ح يقابل
إلحق إجرى
وطاشت كوره
فوق العارضه
حاول تانى
ووقع الواد
لكن قام
يجرى ويتدارى
فى ركن الحيطه
وجريوا وراه
كام دبابه
ودمه بينزف
وجول بيضيع
وكفايه حرام
تحرق دمى
ودمه بينزف
دم يعطر
دم يخضر
خلَّى الأرض
تقول ياسلام
وقع لعِّيب
نزل دكتور
حوشوا الدم
ودمه بينزف
والتانى شاط البلن
برّه العارضه
يابنى إرحمنى
يخرب بيتكوا
ولسه بيجري
يهرب حبه
ويضرب حبه
وبيتدارى وبيتكفى
مش هامٌّه رصاص
وعساكر ددبان
بتدّور على عيل
مش زى عيالنا
لو ينجرح منهم واد
تقوم الدنيا
اُم تطبطب
وأب يدادى
ودَلَع حبه
وشويه شوربه
وكام دكتور
لكنه عيل
خلاّ عقول تتجن
وأنا قاعد
زى خيال ح أتجن
وشويه عيال حرقوا الدم
وزى العاده عيال خايبه
والواد يضوى ويلمع
زى الماس
والنار حواليه
وخلص الماتش
دمى إتصفى
ودمه إتصفى
لكن دمه
خلّى الأرض
تقول ياسلام
دم معطر دم يخضر
دم شهيد
مش دم خيال

مختتم: